អន្តរជាតិ៖ ប្រជាពលរដ្ឋហ្វាំងឡង់បាននាំគ្នាធ្វើដំណើរទៅកាន់ការិយាល័យបោះឆ្នោតនៅថ្ងៃអាទិត្យ ទី២៨ ខែមករានេះ ដើម្បីចូលរួមការបោះឆ្នោតជ្រើសរើសប្រធានាធិបតីថ្មី ដែលជាការជ្រើសរើសថ្នាក់ដឹកនាំដ៏សំខាន់មួយជាជំហរស្របពេលដែលកំដៅរវាងហ្វាំងឡង់ និងរុស្សីក៏បានកើនឡើង ក្រោយពេលដែលផ្ទុះការឈ្លានពានទៅលើអ៊ុយក្រែនជិត ២ឆ្នាំកន្លងមក។ 

ខណៈពេលដែលអំណាចរបស់ប្រធានាធិបតីមានកម្រិត ប្រមុខរដ្ឋដែលដើរតួជាមេបញ្ជាការកំពូលនៃកងកម្លាំងប្រដាប់អាវុធរបស់ហ្វាំងឡង់បានជួយដឹកនាំគោលនយោបាយការបរទេសដោយសហការជាមួយរដ្ឋាភិបាល ដែលមានន័យថាការផ្លាស់ប្តូរភូមិសាស្ត្រនយោបាយនៅអឺរ៉ុបនឹងក្លាយជាកង្វល់ចម្បងសម្រាប់អ្នកឈ្នះឆ្នោតជាប្រធានាធិបតីថ្មី។

អ្នក​នយោបាយ​កំពូល​ពីរ​រូបកំពុងត្រូវបានគេមើលឃើញថាកំពុងមានការនាំមុខទៅលើបេក្ខភាពលេចធ្លោសរុប ៩រូបផ្សេងទៀតដែលបេក្ខភាពលេចធ្លោទាំងពីររួមមានអតីត​នាយក​រដ្ឋមន្ត្រី​អភិរក្សនិយម លោក Alexander Stubb និងអតីត​រដ្ឋមន្ត្រី​ការ​បរទេស​ Pekka Haavisto នៃ​គណបក្ស Green Party ដែល​កំពុង​ឈរ​ឈ្មោះ​ដោយឯករាជ្យ។ នៅតាមកៀកកិតពីក្រោយបេក្ខភាពនាំមុខទាំងពីររូបខាងលើ លោក Jussi Halla-aho ដែលជាបេក្ខភាពស្ដាំនិយមនៃគណបក្សហ្វាំងឡង់ Green Party ក៏ត្រូវបានអ្នកជំនាញរំពឹងថានឹងអាចប្រជែងនៅជុំបន្តជាមួយបេក្ខភាពនាំំមុខទាំងពីរផងដែរ។ 

គួរបញ្ជាក់ថា មណ្ឌលបោះឆ្នោតចាប់ផ្តើមបើកនៅម៉ោង ៩ព្រឹក និងបិទវិញនៅម៉ោង ៨យប់ (ម៉ោងនៅហ្វាំងឡង់)។ 

សូមបញ្ជាក់ថា ថ្មីៗនេះទំនាក់ទំនងការទូតរវាងរដ្ឋាភិបាលទីក្រុងម៉ូស្គូរបស់រុស្សី និងទីក្រុងហេស៊ីនគី (Helsinki) របស់ហ្វាំងឡង់កាន់តែយ៉ាប់យ៉ឺនឡើងបន្ទាប់ពីមានការលុកលុយរបស់រុស្ស៊ីនៅឆ្នាំ២០២២ ទៅលើអ៊ុយក្រែន ដែលជំរុញឱ្យប្រទេសហ្វាំងឡង់ទម្លាក់ចោលជំហរជាប្រទេសមិនចូលបក្សសម្ព័ន្ធយោធាជាច្រើនទសវត្សរ៍កន្លងមកហើយ​  បានសម្រេចចិត្តចូលរួមជាមួយអង្គការណាតូជាផ្លូវការនៅក្នុងខែមេសា ឆ្នាំ២០២៣។ គួរឱ្យដឹងផងដែរថា ប្រទេសហ្វាំងឡង់មានព្រំដែនរួមជាមួយរុស្សីប្រវែង ១,៣៤០គីឡូម៉ែត្រ ក៏ធ្លាប់បានឆ្លើយតប និងព្រមានពីវិធានការតបតយ៉ាងរហ័ស ក្រោយការសម្រេចចិត្តចូលជាសមាជិកអង្គការ NATO របស់ហ្វាំងឡង់៕